The Biter Bit

^{“Ole woman a swea’ fe eat calalu: a swea’ fe wuk him gut”
            —Jamaica Proverb}

Corn an’ peas growin’ t’ick an’ fas’
Wid nice blade peepin’ t’rough de grass;
An’ ratta from dem hole a peep,
T’ink all de corn dem gwin’ go reap.

Ole woman sit by kitchen doo’
Is watchin’ calalu a grow,
An’ all de time a t’inking dat
She gwin’ go nyam dem when dem fat.

But calalu, grow’n’ by de hut,
Is swearin’ too fe wuk him gut;
While she, like some, t’ink all is right
When dey are in some corner tight.

Peas time come roun’—de corn is lef’;
An’ ratta now deh train himse’f
Upon de cornstalk dem a’ night
Fe when it fit to get him bite.

De corn-piece lie do’n all in blue,
An’ all de bard dem floatin’ too
Amongst de yellow grain so gay,
Dat you would watch dem a whole day.

An’ ratta look at ebery one,
Swea’in’ dat dem not gwin’ lef’ none;
But Quaco know a t’ing or two,
An’ swear say dat dem won’t go so.

So him go get a little meal
An’ somet’ing good fe those dat steal,
An’ mix dem up an’ ’pread dem out
For people possess fas’ fas’ mout’.

Now ratta, comin’ from dem nes’,
See it an’ say “Dis food is bes’;”
Dem nyam an’ stop, an’ nyam again,
An’ soon lie do’n, rollin’ in pain.